Sport Club Gjilani ka përmbyllur përgatitjet për duelin e radhës ndaj Llapi, në një periudhë jo fort të lehtë për shkak të kohës së kufizuar në dispozicion pas ndeshjes së fundjavës.
Stafi teknik është përqendruar maksimalisht në rikuperimin fizik të futbollistëve dhe në përgatitjen taktike, duke pasur parasysh ngarkesën e lartë të ndeshjeve në këtë fazë të kampionatit. Seancat stërvitore kanë qenë më të shkurtra, por me intensitet të lartë, me fokus të veçantë në organizimin e lojës dhe korrigjimin e detajeve të vërejtura në ndeshjen e kaluar.
Pavarësisht ritmit të ngjeshur, atmosfera brenda skuadrës mbetet shumë pozitive. Lojtarët kanë treguar përkushtim dhe motivim të lartë, duke reflektuar besimin për të arritur rezultat pozitiv në përballjen e radhës. Fryma e bashkëpunimit dhe uniteti në grup janë elemente që po e karakterizojnë ekipin në prag të këtij takimi të rëndësishëm.
Dueli ndaj Llapit pritet të jetë sfidues, por Gjilani hyn në këtë ndeshje me vetëbesim dhe energji të mirë, i gatshëm për të dhënë maksimumin në fushë pavarësisht kohës së kufizuar për përgatitje.
Për këtë përballje jashtë listes mbeten futbollistët e lënduar Mario Zebic dhe Hamdi Namani, ndërkohë që në skuadër janë përfshirë Edison Kqiku dhe Haris Isufi.
Dueli ndërmjet Llapit dhe Gjilani zhvillohet të mërkurën në “Zahir Pajaziti” të Podujevës me fillim nga ora 13:00.
